"მინდა, ყოველთვის ვიღიმოდეთ, მომეცი ამის შესაძლებლობა" - უკრაინის პრეზიდეტი 45 წლის გახდა: ომში მყოფი ლიდერის დაბადების დღე
უკრაინის პრეზიდენტ ვოლოდიმირ ზელენსკის დღეს, 25 იანვარს დაბადების დღე აქვს. ზელენსკი 45 წლის გახდა. მისი დაბადების დღე ომისა და უკრაინაში არსებული მდგომარეობის გამო, არ არის ისეთი, როგორიც წინა წლებში.
ომში მყოფი ლიდერი მსოფლიოს ერთ-ერთი ყველაზე გავლენიანი პოლიტიკოსია. მას უსმენენ დასავლური ქვეყნების ლიდერები, მის აზრებს ითვალისწინებენ და უფრო მეტიც, ბევრი მისგან მაგალითს იღებს იმის შესახებ, თუ როგორი უნდა იყოს ლიდერი, ბაძავენ მათ შორის, ჩაცმის სტილითაც. თუკი ვინმე ქმნის დღეს ამინდს თანამედროვე მსოფლიოს პოლიტიკაში, ეს ნამდვილად არის ვოლოდიმირ ზელენსკი.ურკაინის პრეზიდენტი საზოგადოების დიდი ნაწილის სიმპათიით სარგებლობს და მისი რეიტინგი ომის შემდეგ უკრაინაში კიდევ უფრო მაღალია. ზელენსკის მიიჩნევენ მამაც და ჭკვიან ლიდერად.
რაც საზოგადოებისთვის თვალშისაცემია, ზელენსკი არ ჰგავს სხვა ლიდერებს, რომელთა სიტყვით გამოსვლაც როგორც წესი, შაბლონური და უემოცოა, უკრაინის პრეზიდენტის სიტყვები, ადამიანების გულამდე აღწევს და ეს ერთ-ერთი მიზეზია, რის გამოც საზოგადოების დიდ ნაწილში სიმპათიას იწვევს. გარდა ამისა, ზელენსკი ხშირად ჩადის ომის ზონაში, სამხედროებთან და ამით მათ უფრო მეტ მუხტს ჰმატებს, აჩვენებს, რომ მუდამ მათ გვერდითაა და ისიც რიგითი ჯარისკაცია.
ვოლოდიმირ ზელენსკი არაერთ მილოცვას იღებს მსოფლიოს სხვადასხვა ლიდერისგან, მხარდამჭერებისგან, თანამოაზრეებისგან, თუმცა განსაკუთრებით ემოციური ტექსტი მისმა მეუღლემ, უკრაინის პირველმა ლედიმ, ოლენა ზელენსკამ გამოაქვეყნა.
"ხშირად მეკითხებიან, როგორ შეიცვალეთ ბოლო ერთ წელიწადში და მე ყოველთვის ვპასუხობ, - არ შევცვლილვართ. ის იგივეა. ის არის იგივე ბიჭი, რომელიც გავიცანი ჩვიდმეტი წლის ასაკში.
მაგრამ სინამდვილეში, რაღაც შეიცვალა: ახლა გაცილებით ნაკლებად იღიმება. გისურვებ ღიმილის მიზეზებს. და ვიცით ამას რა სჭირდება, ყველამ ვიცით, რა იქნება ღიმილის მიზეზი.
საკმარისი სიჯიუტე გაქვს. მთავარია, გქონდეს საკმარისი ჯანმრთელობა. ჯანმრთელობას გისურვებ. მინდა, ყოველთვის ვიღიმოდე შენთან ერთად. მომეცი ამის შესაძლებლობა", - წერს ოლენა ზელენსკა.