ყირიმის განადგურებული აეროდრომი - მედიაში თანამგზავრიდან გადაღებული ფოტოები ვრცელდება
ამერიკულმა კომპანია Planet Labs-მა ყირიმის "საკის“ აეროდრომის ფოტოები გაავრცელა, რომლებიც თანამგზავრიდანაა გადაღებული. ეს ის აეროდრომია, სადაც ორი დღის წინ აფეთქებები მოხდა.
ფოტოებზე ასახულია დამწვარი ტერიტორია და რამდენიმე განადგურებული რუსული სამხედრო თვითმფრინავი.
BBC-ი წერს, რომ მინიმუმ რვა თვითმფრინავი, როგორც ჩანს, დაზიანებული და განადგურებულია. ფოტოებზე გარკვევით ჩანს რამდენიმე კრატერიც.
"თავდასხმაზე უკრაინას პასუხისმგებლობა არ აუღია, მაგრამ ეს ახალი მტკიცებულება მიუთითებს მიზანმიმართული დარტყმის განხორციელების შესაძლებლობაზე“, - წერს BBC-ი.
ცნობისთვის, რუსეთის მიერ კონტროლირებადი ყირიმის დასავლეთ ნაწილში მდებარე „საკის“ აეროდრომზე 9 აგვისტოს რამდენიმე აფეთქება მოხდა, რის შედეგადაც ერთი ადამიანი დაიღუპა.
რუსეთის თავდაცვის უწყების მტკიცებით, აფეთქება საბრძოლო მასალის დეტონაციამ გამოიწვია. უკრაინის საჰაერო ძალების ცნობით, აფეთქების შედეგად ცხრა რუსული სამხედრო თვითმფრინავი განადგურდა. ამასთან, გამოცემა Sky News-მა გაავრცელა ინფორმაცია, რომ ყირიმში მომხდარი აფეთქების უკან უკრაინის სპეციალური ოპერაციების ძალები დგას, რომელმაც სამხედრო ავიაბაზაზე ოპერაცია ჩაატარა.