ტრამპი - საერთოდ არ მაწუხებს რა გავლენას მოახდენს თურქეთთან ურთიერთობის გაუარესება სხვა ქვეყნებში ეკონომიკურ მდგომარეობაზე
აშშ-ის პრეზიდენტი დონალდ ტრამპი მიიჩნევს, რომ აშშ-ის წინააღმდეგ საპასუხო ზომების მიღებით თურქეთი შეცდომას უშვებს.
ამის შესახებ ტრამპმა საინფორმაციო სააგენტო Reuters-სთვის მიცემულ ინტერვიუში განაცხადა.
"ძალიან სამწუხაროა რასაც თურქეთი აკეთებს. ვფიქრობ, ისინი დიდ შეცდომას უშვებენ. აშშ არანაირ დათმობაზე წასვლას არ აპირებს", - განაცხადა დონალდ ტრამპმა.
ამავდროულად აშშ-ის პრეზიდენტმა აღნიშნა, რომ მას საერთოდ არ აწუხებს თუ რა გავლენას მოახდენს თურქეთთან ურთიერთობების გაუარესება სხვა ქვეყნებში ეკონომიკურ მდგომარეობაზე.
"ეს საკითხი საერთოდ არ მაწუხებს. გაკეთდება ის, რაც გასაკეთებელია", - განაცხადა დონალდ ტრამპმა.
ვაშინგტონსა და ანკარას შორის ურთიერთობები მას შემდეგ გაუარესდა, რაც თურქეთმა უარი განაცხადა ამერიკელი პასტორის ენდრიუ ბრანსონის გათავისუფლებაზე, რომელიც გიულენის ორგანიზაციასთან კავშირშია ეჭვმიტანილი და რომლისთვისაც თურქეთის პროკურატურა 35 წლით თავისუფლების აღკვეთას ითხოვს.
შეგახსენებთ, პროტესტანტი პასტორი ენდრიუ ბრანსონი, რომელიც იზმირის რაიონში ცხოვრობდა, 2017 წელს ფეთჰულა გიულენის ორგანიზაციასთან კავშირების ბრალდებით დააკავეს. ბრანსონი თურქული სასამართლოს წინაშე წარსდგა და უარყო მისთვის წაყენებული ბრალდებები. 25 ივლისს მას შინაპატიმრობა მიესაჯა.
აშშ-ს ხელისუფლება თურქეთისგან ამერიკელი პასტორის დაუყოვნებლივ გათავისუფლებას მოითხოვს. აღნიშნულ საქმესთან დაკავშირებით აშშ-მა სანქციები დაუწესა თურქეთის შს და იუსტიციის მინისტრებს.