ლონდონის მეტროში აფეთქებაზე პასუხისმგებლობა "ისლამურმა სახელმწიფომ" აიღო
ლონდონის მეტროში აფეთქებაზე პასუხისმგებლობა ტერორისტულმა დაჯგუფება "ისლამურმა სახელმწიფომ" აიღო. ამის შესახებ ინფორმაციას სააგენტო "როიტერსი" ავრცელებს.
გუშინ, მეტროსადგურ Parsons Green-ზე, რომელიც ლონდონის დასავლეთ ნაწილში მდებარეობს, აფეთქება მოხდა. არსებული ინფორმაციით, ხელნაკეთი ასაფეთქებელი მოწყობილობა ამოქმედდა, თუმცა, არასრული სიმძლავრით.
ინციდენტის შედეგად არავინ დაღუპულა. დაშავებულია 29 ადამიანი.
ლონდონის მეტროში მომხდარ ტერაქტში ეჭვმიტანილი პირი იდენტიფიცირებულია, - ამის შესახებ Sky News-ის კორესპონდენტი მარკ უაიტი იუწყება.
უაიტის თქმით, აღნიშნული ინფორმაცია მას უსაფრთხოების სამსახურში მოაწოდეს. მისივე ცნობით, ეჭვმიტანილის იდენტიფიცირება გარე მეთვალყურეობის ვიდეოკამერების საშუალებით მოხერხდა.