აბიტურიენტები ეროვნული გამოცდებისთვის მომზადებას ახალი მეთოდით შეძლებენ
წელს, აბიტურიენტებს ერთიანი ეროვნული გამოცდებისთვის მომზადება მობილური აპლიკაცია napp-ის მეშვეობითაც შეეძლებათ. აპლიკაცია, რომელიც "სან-დიეგოს სახელმწიფო უნივერსიტეტის" რამდენიმე სტუდენტმა შექმნა, აბიტურიენტებს საშუალებას მისცემს, წინა წლებში გამოყენებული დავალებების ნიმუშებს, პროგრამებს, დამხმარე მასალებსა და სიახლეებს გაეცნონ.
აპლიკაციის ერთ-ერთი ავტორის, დავით სოსელიას თქმით, napp-ის გადმოწერა ნებისმიერი სმარტფონის მეშვეობით არის შესაძლებელი და ამასთანავე უფასოა.
"აპლიკაციას მალე სიახლე დაემატება, რომელიც "გამოცდების ეროვნული ცენტრის" ვებგვერდზე, naec.ge-ზე განთავსებულ სიახლეებს აბიტურიენტებს notification-ების მეშვეობით გააცნობს, რათა საგამოცდო პროცესების შესახებ არაფერი გამორჩეთ. მისი გადმოწერა უკვე შესაძლებელია, ამისათვის App store-ში ან Play Store-ში napp-naec app უნდა მიუთითონ,"-განმარტავს დავით სოსელია.
"გამოცდების ეროვნული ცენტრის" ხელმძღვანელის, მაია მიმინოშვილის თქმით, აპლიკაცია აბიტურიენტებს უკეთ მომზადებაში დაეხმარება, რადგან ის კომფორტული და მოსახერხებელია. Napp-ში, ჯერჯერობით უცხოენოვანი აბიტურიენტებისთვის საგამოცდო დავალებები გათვალისინებული არ არის, თუმცა მიმინოშვილის თქმით, მომავალში მისი დამატება იგეგმება.
აღსანიშნავია, რომ აპლიკაცია ამჟამად სატესტო რეჟიმში მუშაობს და მას ათასზე მეტი აბიტურიენტი იყენებს.
მარიამ მენაბდიშვილი