მოზარდმა საკუთარი სხეულის გაყინვის უფლება მოიპოვა
აქამდე ადამიანების კრიოკონსერვაცია მხოლოდ ფანტასტიურ ლიტერატურაში აღწერილი იდეა იყო. თუმცა, სიტუაცია შეიცვალა. კიბოს უკურნებელი ფორმით დაავადებულმა 14 წლის ბრიტანელმა მოზარდმა, რომლის სახელიც არ ხმაურდება, სასამართლოს საშუალებით საკუთარი სხეულის კრიოკონსერვაციის უფლება მოიპოვა. ის იმედოვნებს, რომ მომავალში მის გალღობასა და მედიცინის ახალი მიღწევების წყალობით კიბოსგან განკურნებას შეძლებენ.
ცნობილია, რომ მოზარდის დედა მხარს უჭერს კრიოკონსერვაციის იდეას, ხოლო მამა წინააღმდეგია.
ამასთან დაკავშირებით, 14 წლის ბრიტანელმა გოგონამ მიმართა სასამართლოს, რათა მისი სხეულის განკარგვის უფლება დედას გადასცემოდა. პაციენტმა მძიმე მდგომარეობის გამო, სასამართლოზე დასწრება ვერ შეძლო, ამიტომ მოსამართლე პირადად ეწვია გოგონას საავადმყოფოში.
აღსანიშნავია, რომ თავად კრიოკონსერვაციის პროცედურა აშშ-ში წარიმართება. პროცედურის ღირებულება 46000 დოლარს შეადგენს. დამოუკიდებელი ექსპერტები პროცედურას სკეპტიკურად უყურებენ, რადგანაც ჯერჯერობით არ არის ის ტექნოლოგიები, რომელიც წარმატებულ გალღობასა და სიცოცხლისადმი დაბრუნებას უზრუნველყოფს.
ლალი ჩხიკვაძე