ყაზახეთის 150 მოქალაქე ბათუმიდან სახლში დაბრუნებას ვერ ახერხებს | Allnews.Ge

ყაზახეთის 150 მოქალაქე ბათუმიდან სახლში დაბრუნებას ვერ ახერხებს

ყაზახეთის 150 მოქალაქე უკვე ორი დღეა ბათუმიდან სახლში დაბრუნებას ვერ ახერხებს, - ინფორმაციას ამის შესახებ ყაზახური მედია ავრცელებს.

როგორც "ინფორმბიურო" წერს, მგზავრები სასტუმროში გადაიყვანეს, სადაც მათ კვებით უზრუნველყოფენ, თუმცა მიუხედავად ამისა, შექმნილი სიტუაციის გამო სტრესის ქვეშ იმყოფებიან.

"სასტუმროში მოგვათავსეს, რომელიც ნამდვილი ჯურღმულია. ქვევით ღამის კლუბია და იქ გათენება შეუძლებელია. ჩვენ დავუკავშირდით ყაზახეთის საელჩოს საქართველოში, მაგრამ იქ ქართულ ენაზე პასუხობენ და არაფერი გვესმის. რაც ყველაზე ცუდია, თვითონ ავიაკომპანიაში გაფრენის დროის შესახებ კონკრეტულს არაფერს ამბობენ. გვითხრეს მხოლოდ ის, რომ რეისები ტექნიკური მიზეზით გადაიდო", - განაცხადა ერთ-ერთმა ტურისტმა საიდა ბაინახაროვამ.

ბათუმში ჩარჩენილი ყაზახი ტურისტების გამგზავრების საკითხი ამ დრომდე გაურკვეველია

ბათუმის საერთაშორისო აეროპორტიდან ყაზახეთის მიმართულებით ფრენებს ყაზახური ავიაკომპანია  SkyBus ასრულებს. როგორც კომპანიაში განაცხადეს, რეისის გადადების მიზეზი თვითმფრინავის ტექნიკური გაუმართაობა გახდა. კომპანიაში ვერ ასახელებენ ზუსტ დროს, თუ როდის იქნება ფრენა, თუმცა აცხადებენ, რომ სავარაუდოდ, ეს დღეს, დღის მეორე ნახევარში მოხდება.

 

myquiz